1918-ci ilin 28 may günü yalnız bir dövlətin yaranma tarixi deyildi. O gün əsrlərlə imperiyaların, işğalların, siyasi təzyiqlərin içində milli ruhunu qoruyub saxlayan bir xalq ayağa qalxaraq bütün dünyaya bəyan etdi ki, Azərbaycan xalqı öz taleyinin sahibi olmağa qadirdir. Həmin gün müsəlman Şərqində ilk demokratik, hüquqi və dünyəvi dövlət – Azərbaycan Xalq Cümhuriyyətinin yaranması tarix səhnəsinə çıxdı. Bu, təkcə Azərbaycan tarixinin deyil, bütövlükdə Şərq dünyasının siyasi düşüncə tarixində yeni bir mərhələnin başlanğıcı idi.

Azərbaycan Xalq Cümhuriyyəti sübut etdi ki, azadlıq yalnız arzu deyil, milli iradə və siyasi qətiyyətlə gerçəyə çevrilən müqəddəs bir idealdır. Cəmi 23 ay yaşamasına baxmayaraq, Cümhuriyyət xalqın yaddaşına silinməz bir istiqlal möhürü vurdu. O qısa zaman kəsiyində yaradılan parlament, milli hökumət, dövlət atributları, milli ordu, təhsil və hüquq sistemi gələcək müstəqil Azərbaycanın bünövrəsinə çevrildi.

O dövrün ağır və mürəkkəb siyasi şəraitində Azərbaycan ziyalıları və dövlət adamları tarix qarşısında misilsiz bir məsuliyyət daşıyırdılar. Onlar anlayırdılar ki, müstəqillik yalnız bayraq qaldırmaq deyil, həm də milli dövlətçilik şüurunu formalaşdırmaqdır. Məhz buna görə də yeni yaranmış dövlət ilk gündən xalq hakimiyyəti, qanunun aliliyi və vətəndaş bərabərliyi prinsiplərinə söykəndi.

İstiqlal Bəyannaməsi imzalanarkən Azərbaycan xalqının gələcək taleyi üçün taleyüklü qərar qəbul edilirdi. Bu sənəd təkcə hüquqi akt deyildi; o, əsarətdən azadlığa gedən yolun manifesti idi. Bəyannamə ilə xalqın milli suverenliyi elan olundu, Azərbaycan dünyanın siyasi xəritəsində müstəqil dövlət kimi yer aldı.

Azərbaycan Xalq Cümhuriyyəti Şərqdə ilk dəfə olaraq parlamentli respublika modeli yaratdı. O dövr üçün olduqca mütərəqqi sayılan bu dövlət sistemi milli və dini mənsubiyyətindən asılı olmayaraq bütün vətəndaşlara bərabər hüquqlar verirdi. Qadınlara seçki hüququnun tanınması isə Cümhuriyyətin nə qədər qabaqcıl və demokratik düşüncəyə malik olduğunu göstərən mühüm fakt idi. Bu addım bir çox Avropa ölkələrindən belə əvvəl atılmışdı.

Milli dövlət quruculuğunun ən mühüm dayaqlarından biri ordu idi. Azərbaycan Xalq Cümhuriyyəti milli ordunun yaradılmasına xüsusi önəm verdi. Qafqaz İslam Ordusu ilə birlikdə Bakının işğalçılardan azad olunması xalqın milli qürurunun bərpası demək idi. O gün Bakıda dalğalanan üçrəngli bayraq təkcə bir şəhərin deyil, bütöv millətin azadlıq simvoluna çevrilmişdi.

Cümhuriyyət hökuməti yaxşı anlayırdı ki, xalqı yaşadan yalnız siyasi istiqlal deyil, həm də maarif və mədəniyyətdir. Buna görə də təhsil sahəsində mühüm islahatlara başlanıldı. Məktəblərdə ana dilində tədris tətbiq olundu, milli kadrların hazırlanması istiqamətində ciddi addımlar atıldı. 1919-cu ildə Bakı Dövlət Universitetinin yaradılması isə Azərbaycan xalqının elm və təhsilə verdiyi yüksək dəyərin parlaq nümunəsi idi. Bu addım gələcək milli ziyalı nəslinin formalaşmasında mühüm rol oynadı.

Azərbaycan Xalq Cümhuriyyəti beynəlxalq münasibətlər sistemində də fəal mövqe tutmağa çalışırdı. Gənc dövlətin əsas məqsədi dünya birliyi tərəfindən tanınmaq, Azərbaycanın milli maraqlarını beynəlxalq səviyyədə qorumaq idi. Paris Sülh Konfransında aparılan diplomatik fəaliyyət Azərbaycan dövlətçiliyinin beynəlxalq hüquqi əsaslarının möhkəmlənməsinə xidmət etdi. Məhz həmin siyasi irs sayəsində Azərbaycan sonrakı ağır tarixi sınaqlarda belə dövlətçilik ideyasını itirmədi.

1920-ci ilin aprelində bolşevik işğalı nəticəsində Azərbaycan Xalq Cümhuriyyəti süqut etsə də, istiqlal ideyası xalqın qəlbindən silinmədi. Bayraq endirildi, amma milli ruh məğlub olmadı. Azərbaycanın azadlıq arzusu onilliklər boyunca xalqın yaddaşında yaşadı, gizli bir məşəl kimi nəsildən-nəslə ötürüldü.

XX əsrin sonlarında Azərbaycan yenidən öz müstəqilliyinə qovuşdu. Lakin müstəqilliyi əldə etmək qədər onu qorumaq da çətin idi. Ölkədə siyasi böhran, iqtisadi çətinliklər, Ermənistanın təcavüzü və daxili qarşıdurmalar dövlətçiliyi ciddi təhlükə qarşısında qoymuşdu. Belə ağır bir zamanda xalq öz xilaskarını çağırdı və Heydər Əliyev hakimiyyətə qayıtdı.

Ulu Öndərin qətiyyətli siyasəti nəticəsində Azərbaycan dövlətçiliyi qorundu, ölkədə ictimai-siyasi sabitlik bərqərar edildi, milli birlik möhkəmləndirildi. Azərbaycanın beynəlxalq nüfuzu artdı, enerji strategiyası formalaşdırıldı, dövlətçilik ənənələri daha da gücləndirildi. Məhz həmin uzaqgörən siyasət müasir Azərbaycanın güclü dövlətə çevrilməsinin əsasını qoydu.

Bu siyasi kurs bu gün İlham Əliyev tərəfindən uğurla davam etdirilir. Azərbaycanın ərazi bütövlüyünün bərpası, işğaldan azad olunmuş torpaqlarda üçrəngli bayrağımızın dalğalanması xalqımızın tarixi qələbəsi və milli qürur mənbəyidir. Qarabağda, Şuşada, Xankəndidə dalğalanan bayraq Azərbaycan Xalq Cümhuriyyətinin ideallarının yaşadığını göstərir.

Bu gün Azərbaycan yalnız regionun deyil, dünyanın diqqət mərkəzində olan güclü dövlətlərdən biridir. Ölkədə həyata keçirilən siyasi, iqtisadi və sosial islahatlar xalqın rifahına xidmət edir. Demokratik dövlət quruculuğu, vətəndaş cəmiyyətinin inkişafı, milli-mənəvi dəyərlərin qorunması müasir Azərbaycanın əsas prioritetlərindəndir.

2021-ci ildə qəbul edilən “Müstəqillik günü haqqında” Qanunla 28 Mayın Müstəqillik Günü kimi rəsmiləşdirilməsi bir daha təsdiq etdi ki, müasir Azərbaycan Respublikası Azərbaycan Xalq Cümhuriyyətinin siyasi və mənəvi varisidir. Bu dövlətçilik xətti zamanın sərt sınaqlarından keçərək bu gün də yaşayır və inkişaf edir.

Azərbaycan xalqı tarix boyu çox ağrılar yaşayıb, ağır sınaqlardan keçib. Amma heç vaxt azadlıq iradəsini itirməyib. Çünki bu xalqın ruhunda istiqlal sevgisi yaşayır. O sevgi ki, bir zamanlar Cümhuriyyət qurucularını ayağa qaldırmışdı, bu gün də müasir Azərbaycanın güc mənbəyinə çevrilib.

“Müstəqilliyimiz əbədidir, dönməzdir, sarsılmazdır!” – bu fikir sadəcə siyasi şüar deyil, xalqın tarixdən süzülüb gələn milli andıdır. Bu and Azərbaycanı gələcəyə aparan mənəvi dayaqlardan biridir.

Yaşasın azadlıq ruhunu qoruyan Azərbaycan xalqı!
Yaşasın üçrəngli bayrağımız!
Yaşasın güclü, qüdrətli və müstəqil Azərbaycan!

Sonda xalqımızı qarşıdan gələn müqəddəs Qurban Bayramı və Müstəqillik Günü münasibətilə ürəkdən təbrik edir, hər bir ailəyə firavanlıq, ruzi-bərəkət, dövlətimizə əmin-amanlıq və daim yüksələn qüdrət arzulayırıq. Allah Azərbaycanı qorusun!