Ruhunun qapısı - Ədalət Qarabulud

Redaktorun seçimi

2-09-2025, 00:52 3 337

Ruhunun qapısı

(Ruhani-fəlsəfi poetik kompozisiya)

I. Satma
Yeni olan dünyaya aldanma,
o – köhnə bir sınağın başqa geyimidir.
Parıltısa da, dərinliyi yoxdur,
səssiz qalan ruhunun səsini boğar.
Satma…
Əbədi olanı dəyişmə gündəlik yalanla.
Gözəgörünməz ipini qırma ruhunun –
Onu heç kim görmür,
amma o var.
və sən onsuz boşsan.
İnsan ruhla insan olur,
əl ilə deyil, ürəklə toxunur həyata.
Kim ruhunu satırsa,
o – artıq alınmır geriyə.

II. Səssiz məbəd

Səssizliyə qulaq ver,
çünki orda Allah danışır.
Sözlə yox…
Bir nəfəsin içində,
bir damlanın düşdüyü an –
orada gizlənir həqiqət.
Ruhunu təslim etmə
rəqəmlərə,
dərəcələrə,
bəyənilərə.
O, ölçülməz.
O, yalnız hiss edilər –
səcdənin dərinliyində,
bir uşağın təbəssümündə,
bir qocanın sükutunda.

III. İçindəki atəş

Ruh sönmür,
sadəcə gizlənir
qaranlıq alış-verişlərdə,
içinlə çölün uyğun gəlmədiyi anlarda.
Amma o atəş yenə də ordadır,
və səni çağırır
öz adınla,
öz doğuluşunla.
Dinlə –
Hər gecənin içində bir nur var.
Hər ağrının içində bir dua.
Hər sınmış qəlbdə bir mələk
əllərini uzadır.

IV. Sən işıqsan

Unutma:
sən bir cismin kölgəsi yox,
bir ruhun işığısan.
İçindən doğur
hər şeyin mənası.
Zəmanə dəyişsə də,
qorxular dəyişsə də,
modalar, ideallar,
təriflər dəyişsə də –
Əbədiyyət dəyişməz.
Ruhun onun aynasıdır.
Toz içində parıldayan bir inci kimi,
öz içində qal
və tap –
Səni yaradanın nəfəsini.
[Son söz olaraq:]
Bu dünya sənin evin deyil.
Ruhun dincəlmək üçün deyil,
ucalmaq üçün yaradılıb.

Ədalət Qarabulud

BİA.az