Kamran sözünün ağası, işinə sadiq və tənqidci bir jurnalist idi - VİDA SÖZÜ

66 yaşında vəfat edən baş redaktor, sözün və qələmin əsl sahibi, dostluğun və jurnalistikanın nümunəsi olaraq yadda qalacaq.

Dünən jurnalistika aləmi böyük bir itkini yaşadı – Kamran Məhərrəmli dünyasını dəyişdi. Onun itkisi yalnız mətbuat camiəsi üçün deyil, həm də hər birimiz üçün böyük boşluq yaradır. Mən Kamranı uzun illər tanımışam və onunla bir müddət bir yerdə çalışmaq mənim üçün həm şərəf, həm də həyatın dəyərli bir dərsi oldu.

Kamran sözünün ağası, işinə sadiq və tənqidi gözü ilə tanınan bir jurnalist idi. O, nöqsanları görməkdən çəkinməz, həmişə doğru olanı söyləməyə cəsarət edərdi. Onun jurnalistikaya yanaşması, prinsipiallığı və etik prinsiplərə sadiqliyi hər zaman nümunə olaraq qalacaq. Kamran üçün xəbər yalnız informasiya vermək deyildi; o, hər xəbərdə vicdan və ədalət axtarırdı.

Eyni zamanda, Kamran gülməyi sevən, ətrafına işıq saçan bir insan idi. Onun gülüşü yalnız bir əhval-ruhiyyə ifadəsi deyildi; o, ətrafındakıların ruhunu da yüngülləşdirirdi. Xatırlayıram, bir dəfə redaksiyada çətin bir hadisə baş verəndə, divarı yumruqlayaraq dedi:
“Əşşi bəxtim yoxdur, it ilində heç olmasa bir dəfə məhkəməyə verilməliydim, amma mənim əvəzimə səni verdilər.”
O an zarafat etdiyini düşündük, amma Kamran zarafatı da həqiqət qədər ciddi deyirdi.

Kamran Məhərrəmli 1960-cı ildə Zəngilanda anadan olmuş, Bakı Dövlət Universitetinin mexanika-riyaziyyat fakültəsini bitirmiş və uzun illər mətbuatda çalışaraq jurnalistikanın inkişafına böyük töhfələr vermişdir. O, yalnız xəbərlərin deyil, həm də insan münasibətlərinin, dostluğun və jurnalist etikasının canlı nümunəsi idi.

Hər kefi saz olanda təkrar etdiyi misralar isə onun dünyaya baxışını göstərirdi:

“DEŞİLİB, HƏR ŞEY DEŞİLİB,
YER DEŞİLİB, GÖY DEŞİLİB.
ELƏ BİL HAMI DEŞİLİB,
DÜNYANIN DAMI DEŞİLİB.
ŞAİRİN İLHAMI DEŞİLİB,
XALQIN SƏBR KASASI-CAMI DEŞİLİB.
AXIDIR, HƏR ŞEY AXIDIR,
ELƏ BİL DÜNYANIN AXIRIDIR...”

Bu misralar onun həm şair ruhunu, həm də həyata dərin düşüncə ilə baxışını əks etdirir. Kamran hər zaman insanları düşündürən, doğruyu və haqlını axtaran bir qəlbə sahib olmuşdur.

İndi o, dünyadan gedib, amma onun işığı, tənqidi baxışı, dostluq sevgisi və jurnalistikaya olan sadiqliyi bizimlə həmişə qalacaq. Kamran Məhərrəmli, sən jurnalistikanın, dostluğun və insanlığın dəyərli bir simvolu olaraq yadda qalacaqsan. Allah sənə qəni-qəni rəhmət eləsin, ruhun rahatlıq tapsın, işığın isə qəlbimizdə əbədi yaşasın!